2020 kum thimnak ah mee a petu ding mi chung in COVID-19 zawtnak ruang ah Facility Quarantine (erkhumh) a si mi hna cu, a hlankan ni 10 aa duh ah mee pekter an si lai, tiah kan theih.
Hi kong he pehtlai in Chin Ramkulh Election Commission Zung lutlai Pu Uk Nawl nih, “COVID-19 zawtnak ruang ah Facility Quarantine ah chiah mi minung hna cu a hlankan in mee kan pekter hna lai. Facility Quarantine chiah mi hna cu mee an pek khawh nakhnga a bik in tawlrelpiak an si lai. A hlankan mee pek hi phun hnih in a um i, 10 hlankan mee le ni 2 a hlankan mee tiin a um. Facility Quarantine chiah mi hna cu 10 a hlankan mee in kan pekter hna lai,” tiah The Hakha Post ah a chim.
2020 kum thimnak ah hin Facility Quarantine chiah mi lawng si loin pumtlinglo hna zong a hlankan in mee pek khawh a si, tiah kan theih.
“2020 kum thimnak ah Ngandamnak leikap tawlreltu ding ah siseh, mee cazin tar mi zohfeltu ding ah siseh, volunteers mino pawl hi an biapi taktak i kan in herh taktak hna. Thazaang chuah in kan bawm rih hram ko u,” tiah Pu Uk Nawl nih a chimchap.
COVID-19 zawtnak nih thimnak a hnursuan nakhnga lo le thimnak tuah tik ah zawtnak an i chonh nakhnga lo, COVID-19 Runven, Kham le Zohkhenhnak Committee tawlrelpinak in tuah a si lai, tiah kan theih
