2020 November 8 ah tuah mi Myanmar ram thimnak kong he pehtlai in Dr. Tluang Za Thang (GTI), Salai Van Cung Lian (Victoria academy) le Sayama Tha Cin Sung (CWO) nih November 9 ah a tanglei bantuk in zoh thannak an ngei.
Thimnak ah aa zuamcawhtu party hna nih mee lemsoinak an tuah ningcang (campaign) cung ah Sayama Tha Cin Sung nih a chim mi cu “party mee pek sawmnak an tuah ningcang hi thlennawn pah cu a hau ko tiah ka ruah. Cu thlen a hau ko tiah ka ruah mi cu mee pek an sawm ning cang hi a si. Khuate lei ah kal in mee sawmnak hi biatak tein an tuah, nain khuapi chung ahhin party thazaang hmuhsaknak le catlap phawtnak ti hrawnghrang deuh lawng hi an tuah mi a si tik ahcun tlawmte cu a chambau deuh kho ko tiah ka ruah, khuate lei he khuapi lei he tuah kho hna sehlaw ticu ka duh,” tiah The Hakha Post biaruahnak ah a chim.
Salai Van Cung Lian nih Chin National League for Democracy (CNLD) an sunghnak he pehtlai in hitin a chim; “CNLD an sunghnak ahhin chim ding cu a tampi ko hnga, nain keimah ruah khawh vial ah tlawmpal ka hmuhmi cu an i timhlam ningcang (strategy) hi a derthawm deuh. Cun, an policy zong hi a tak nun ah a si kho dingmi a tlawm deuh fawn (reality a tlawm).Cu pin ah, candidate a thim hna tik ah profile a niam tuk deuh fawn. Nain, NLD hi an i timhlamh ningcang a tha tiah ka ruah. Teinak an hmuhnak zong hi an i timhlamh ningcang(Strategy) a hman caah a si ko tiah ka ruah. Minung an hman hna ning zong a tha tiah ka ruah,” tiah The Hakha Post ah a chim.
Dr. Tluang Za Thang zong nih CNLD an sunghnak he pehtlai in amah pumpak hmunnak cu hitin a langhter ve. “CNLD nih mizapi lungthin chung ah pil kho ding in caan an pek mi a tawi tuk. Thimnak caan a phak lai te lawng ah cawlcanghnak an ngeih tik ah cun, mizapi lungthin ah an pil manh ti lo. Mizapi nih theih manh an si ti lo. Cun, an candidate pawl an i thim ning, an i thlennawn ning ti bantuk nih khan mizapi lungthin tamtuk a buaibai ter,” tiah a chim.
Myanmar rampi thimnak cu 2020 November 8 ah tuah a si i, tluangtlam in aa lim. Chinram chung ahhin party 12 an izuam hna i, chaklei laitlang (Hakha, Thantlang, Tedim le Falam) ahhin party 3 le independent tiin an i zuamcawh hna. Hi aa zuamcawhtu party lak ah NLD nih teinak bual a co, Chin State ahhin NLD nih zatuak 92% teinak an hmuh i, CNLD in Pu Siang Mang nih Pyine Hluttaw No. 2 ah teinak a hmuh.
