Chin Ramkulh chung 2020 kum Myanmar ram thimnak ca ah mee thla kho cazin hi a liamcia kum 2015 lio nakin 70,000 in a tam deuh tiah Ramkulh, thimnak Zung Lutlai Pu Uk Nawl sin in thawng kan theih.
Chin Ramkulh chung ah 2020 kum thimnak ca ah voi khatnak mee cazin an tar ning ah mee a thla kho ding hi minung 340,000 an si. A liamcia kum 2015 lio ahcun minung 270,000 leng an si tiah theih a si.
“A voi khatnak mee cazin kan tar mi tiang ahcun 2015 kum lio nakin tukum hi mee a thla ding minung 70,000 in an tam deuh. Hi nak tam deuh zong aa chap kho rih mi a si. Ramleng lei in a rak tlung ding zong minung 20,000 leng an um rih,” tiah Pu Uk Nawl nih The Hakha Post he tonbiaruahnak ah a chim.
Myanmar ram pumpi huap in 2020 July 25 in August 7 tiang mee cazin a voi khatnak an tarpiak hna i mee cazin tar mi min aa palh mi, a um ti lomi le a dangdang a tling lomi pawl remhpiak than ding in minung a thong leng nih an hal than tiah kan theih.
Cun, “Atu bantuk in mee thla kho ding an tam deuh rualrual in Hluttaw Palai hna zong kum dang nakin mee tam deuh an hmuh ve ding hi a biapi ngai. Kumdang i mee 8000 an ngah mi kha tukum ahcun mee 15000 tal cu an ngah a hau,” tiah Thimnak Zung i secretary Pu Lin Kyaw nih a chim.
Peng kua a si mi Chin Ramkulh chung ah mee hmun, hmun 39 a um i, Pyithu Hluttaw mee hmun hmun 9, Amyotha Hluttaw mee hmun 12, Ramkulh Hluttaw mee hmun hmun 18 a um. Mee hmun hmun 39 chung ah Hluttaw Palai minung 211 an i zuam lai i, hi minung 211 chung ah nu 18 an i tel tiah kan theih.
2020 kum Myanmar ram party tling democracy thimnak cu November 8 ah an tuah lai i, Myanmar ramhuap in Pyithu Hluttaw mee hmun hmun 330, Amyotha Hluttaw mee hmun hmun 168, Ramkulh le Ramthen Hluttaw mee hmun hmun 644 le Affairs Minister mee hmun hmun 29 a um tiah UEC nih a langhter.
