2020 kum ca cawn kum ah siangniamruun le sianglairuun siangngakchia chung in subject pakhat hmanh a cawng rih lomi siangngakchia minung 8 million leeng an si tiah Ramkomh, Fimcawnnak Zung in thawng kan theih.
Sianginn hi kum khat ah thla 10 chung kai a si i, tu kum tu hi cu COVID-19 zawtnak ruang ah sianginn khaar hi thla 5 a si cang i, siangngakchia hna ca an cawng kho ti lo.
Hi kong he pehtlai in Ramkomh Fimcawnnak Zung Lutlai Dr. Tin Maung Win nih, “2020 kum ca cawn kum hi COVID-19 ruang ah sianginn khaar dih a si. Siangsangruun, sianglairuun le siangniamruun siangngakchia minung 8 million ca an cawng ti lo. Siangsangruun siangngakchia hna chung zong in minung sing 12 leeng an um ve. Kum dang ahcun June thla in sianginn hon a si i, November thla ahhin khaar te khaarpiak a si tawn. Cun, ca cawnmi chung zong in zatuak 75% rak liim dih a si nain, tukum cu fang khat hmanh ca an cawng lo,” tiah The Hakha Post ah a chim.
Siangsangruun sianginn hi sianginn kaiter an si nain, thla khat tluk an kai hnu ah COVID-19 zualhma lei a panh i Cozah lei nih a khaarter than dih hna tiah kan theih.
Cun, Chin Ramkulh, Fimcawnnak Zung Lutlai Pu Bi Ko Do nih, “Chin Ramkulh chung ahcun ca a cawng manh mi hi an tlawm tuk. Tlawmpal cu rak cawnter an si ko nain COVID-19 ruang ah khaar than dih a rak si. Cun, Chin Ramkulh chung ahhin siangngakchia ca a cawng bak lomi minung sing 1 le thong sawmthum hrawng an si,” tiah The Hakha Post ah a chim.
Sianginn khaar dih a si ca ah cawnnak lei zeihmanh a um ti lo i, camipuai phit zong a um ti lai lo tiah theih a si.
