2019 December 18 ah a rak kaang mi Falam Thingram Zung cu nihin tiang theh a si rih lo ca ah a pawngkam khuasa mi hnahnawhnak a pek hna ca ah lungrethei in an um, tiah kan theih.
Hi kong he pehtlai in Thingram Zung thlang ah a um mi inn ngeitu pakhat nih, “A kanghka in atu tiang zeihmanh an tuah lo ca ah a thlang i a um mi kanmah ca ah a har tuk. Aruang cu a kaang mi a si ca ah zeitik ah dah a tung hi a tluk lai i kan inn a nenh lai ti lawng kan phang. Cun, a cungcih canphio pawl zong zeitik ah dah thli nih a choih lai i kan i khawngdeng lai ti lawng kan ruat. Thianhhlimhnak tehmanh atu tiang an tuah rih lo. Rianrang in an theh khawh lo hmanh ah a thianh tal cu kan thianhpiak hna seh ti kan duh. Cun, Cozah sin ah nawlnak kan tuah nain atu tiang zeihmanh tuan le tuah a um rih lo,” tiah The Hakha Post ah a chim.
Falam Thingram Zung hi a liamcia 2019 December 18 zaan suimilaam 12:15 tluk ah a rak kaang mi a si. Hi zung a kanghnak hi thla hnih leng a rau cang nain nihin tiang ah zeihmanh tuah rih loin an zohsawh ca ah pawngkam khuasa mi an thinphang.
Cun, Cozah sin ah nawlnak an tuah mi kong he pehtlai in Chin Ramkulh Thingramlei Minister Pu Mang Hen Dal nih, “Hi Zung hi kanmah duhnak ahcun rianrang in sak kan duh tuk ve ko nain tangka budget a tlak rih lo ca ah kan tuahtuan ve rih lo. Cun, cozah sin ah an kan nawlnak le ca an kan peknak kan hmu lo, a theih zong kan thei lo,” tiah The Hakha Post ah a chim.
photo/CH Daily News
