Hakha khua ah a um mi Chin Galaxy Private High School cu 2019 tanghra camipuai ah zatuak 40 an awng i Chin Ramkulh pumpi ah tanghra result a tha bik sianginn a si.
2019 taanghra camipuai ah Chin Galaxy sianginn in siangakchia pa 25, nu 26, an dihlak 51 nih an phit i 20 an awn ca ah a awng mi zatuak 40 an si. Chin Ramkulh chung a pahnihnak le pathumnak result tha bik sianginn cu Tonzaang peng ah a um mi Darkhai taang hra siang inn le Mindat ah a um mi Grace Private sianginn an si. Darkhai sianginn in zatuak 38.46 an awng i Grace sianginn in zatuak 36.14 an awng.
Chin Ramkulh chung ah 2019 taang hra camipuai a awng mi an um lonak taang hra sianginn 22 an um. Matupi peng ah sianginn panga, Falam peng ah sianginn pali, Paletwa peng ah sianginn pali, Thantlang peng ah sianginn pathum, Tonzaang peng ah sianginn pahnih, Mindat peng ah sianginn pahnih, Tedim peng ah sianginn pakhat le Kanpetlet peng ah sianginn pakhat an si.
Chin Ramkulh pumpi ah 2019 tanghra camipuai a phi mi siangngakchia 10771 an si. Cu chung ah 2110 lawng an awn ca ah zatuak 19.59 lawng an awng i Myanmar ram pumpi ah a niam bik a si.
Chin Ramkulh chung peng pakua lak ah Falam peng in a awng mi zatuak in an tam bik i zatuak 29.43 an si. Pahnihnak cu Mindat peng a si i zatuak 23.95 an awng. Pathumnak cu Hakha peng a si i zatuak 23.53 an awng.
Paletwa peng taanghra result a chia bik i a phi mi 1770 lak ah 121 lawng an awn ca ah zatuak 6.84 lawng an awng.
Ram dang in a phi mi pawl tel in Myanmar ram pumpi ah 2019 taanghra camipuai a phi mi siangngakchia dihlak 851524 an si i a awng mi 267696 an si, zatuak 31.44 an awng tiah kan theih.##
