Chin Ramkulh, chaklei laitlang Hakha Peng chung 2018-2020 kum kar ah Palek le rian ngeitu hna nih case a ngan mi tiah an ti mi case voi 7 tiang a chuak tiah theih a si.
Palek le rian ngeitu hna nih case ngan tiah an timi hna hi, mi thah, mi ramh, fir, minung i zuar, tlaihhrem, saram fir, ram zeirel lo, hriamnam lei, dikfel loin riantuan, inn bauh pawl hi a si.
Palek lei nih case a ngan mi tiah an langhter mi chung in Hakha Peng ahhin 2018 kum ah tlaihhrem voi 2, mi thah voi 1 le 2020 kum ah tlaihhrem voi 2, mi thah voi 2 an si.
Hi kong he pehtlai in Hakha palek sakhan hmu nih, “2019 kum ahhin cun case a ngan mi cu a um lo. 2018 le 2020 kum lawng ah a um. Kei ka phaknak hi a caan a sau rih lo ca ah thong kum zeizatdah an thlak hna i dan an tat hna ti ka thei kho lo. Atu bantuk in case ngan a tamnak hi Hakha hi ni khat hnu ni khat in minung kan karh. Cun, ni khat hnu ni khat in kan thancho deuhdeuh bantuk in sualnak tuah zong hi a tam chin lengmang ve ca ah a si bik ko,” tiah The Hakha Post ah a chim.
Case a ngan mi voi 7 tiang a chuak mi chung ah 2020 kum i mithahnak case pakhat cu tet-te a tlin lo ca ah an phih than tiah theih a si.
2019 kum Hakha Peng chung ah case a ngan mi cu a um lo nain, case a fa deuh mi le case a dangdang a ummi dihlak case 561 a chuak ve tiah Hakha Palek sakhan nih cazin an langhter mi chung ah kan hmuh.
