Chin Ramkulh Rit-haisii Dohnak le Khamnak Phu tawlrelnak in 2018-2019 kum Chin Ramkulh chung ah bing cinnak acre 134 an hrawh.
June 26, Hakha Bo Thai Chawn Hall ah tuah mi A Voi 32nak Vawlei Pumpi Rit-haisii Hmannak le Phunglutlo Zuarchuah Khamnak Ni ah Chin Ramkulh Chief Minister Pu Salai Lian Luai nih a chim mi a si.
“Chin Ramkulh chung i bing cinnak hlohtlau nakding ah kum fatin bing cinnak hrawh a si. 2015-2016 kum ah acre 1320, 2016-2017 kum ah acre 69.25 le 2018-2019 kum ah acre 134 hrawh a si. Chin Ramkulh chung ah bing a ciing mi khua hi Falam Pengkomh, Tonzaang Peng lawng ah a si. Bing cinnak a tlau khawh nakhnga fimchimhnak le cawnpiaknak zong kan tuah i hmailei a pawcawm nakding ca zong ah tawlrelpiak an si,” tiah Chin Ramkulh Chief Minister Pu Salai Lian Luai nih a chim.
Hi ni ah Rit-haisii Dohnak kong he pehtlai in zuk suai, muitawn suai, computer in zuk suai le poster suai zuamnak ah laksawng a hmu mi siangngakchia laksawng peknak zong an tuah. Siangngakchia 188 an i zuam i 32 nih laksawng an hmuh.
Myanmar ram Rit-haisii Hmannak le Phunglutlo Zuarchuah Khamnak Phu Chairman, Pyidaungsu Runvennaklei Minister Zung, Pyidaungsu Minister Duh-ti-ya Bogyoke Gyi Kyaw Swe nih cabia kuat mi cu Chin Ramkulh Ramri lei Runvennak Minister Bohmugyi Haan Win Aung nih a rel. “Myanmar ram chung bing cinthlak mi hlathlainak tuah ning in 2017 kum ah bing cinnak 41000 hectares le bing chuahnak 550 metric ton le 2018 kum 37300 hectares le 520 metric ton a si i tu kum ah bing cinnak zatuak 9.1 a zor i bing chuahnak 5.45 a zor. Bing cinnak le chuahnak cu a zor nain khat lei ah rit-haisii tlaihnak cu kum khat hnu kum khat a kai,” tiah Duh-ti-ya Bogyoke Gyi Kyaw Swe cabia chung ah aa tial.
Hi ni ah Dr. Thang Hnin Lian nih, “Mino hi thil thar theih a duh mi le hawi nakin hmasa a duh mi an si tik ah zei thil poh kha tuah chun (Test) an duh. Cu an tuah chunnak cun a lem thai hna i a donghnak ah cun rit-haisii sal ah an tang. Rit-haisii tawngh le hman an duh peng tik ah a hnu ah cun fir in mi nunnak laaknak tiang a phan. Cu ti cun, fale hi lam cung an phan lai an hmailei a rawk lai. Cucaah, nulepa le cachimtu hna hi kan fale nih zohchun awktlak in kan nun a herh. Lam a pialtertu kan si lo ding kha a biapi tuk,” tiah a chim.
Hi ni ah Hakha khua chung BEHS No. 1, 2 3 le 4 nih drama tawi hmuhsak zuamnak an ngei i BEHS No. 3 nih pakhatnak, No. 4 nih pahnihnak le No. 2 nih pathumnak an hmuh.###
