Chin Ramkulh Cozah le Hluttaw nih 2018-2019 tangka kum budget kong he pehtlai in 144.89 billion an fehter, Pyidaungsu Cozah sin ah an chimh lio a si, 2017-2018 nain budget a tlawm deuh nain lungretheih awk a si lo, tiah Minister Pu Vui Kaw nih June 19 The Hakha Post ah a chim.
“2017-2018 Chin Ramkulh tangka kum ahcun 155.7 billion hrawng a si. Tukum ca hi a tlawm deuh nain Ramkulh Cozah nih a lenglei in hmuh nakding tampi kan ngeih ko ca ah kan tumchuk, kan tla ti ding a si lo. Lungretheih tuk ding zong a si lo. Atu hi Pyidaungsu Cozah sin ah kan chimh lio a si i an kan lungtlinpi ahcun October thla hlan ah a fiang te ko lai,” tiah Chin Ramkulh Cozah Planning and Financial Minister Pu Vui Kaw nih The Hakha Post ah a chim.
Chin Ramkulh Cozah nih 2018-2019 tangka kum ca ah 144.89 billion lawng Pyidaungsu ah an hal nain Chief Minister le Ministers hna nih Chinram ca ah zeidah a herh ti mi an hlathlai i a herh ning bantuk in budget kawlhawl than ding timhtuahnak zong an ngei, tiah kan theih.
