2015 kum thimnak ah khan ka sunghnak khuate khua 4 bak an lungfim cang, khuate ah zatuak 75% le khuapi ah zatuak 67% in teinak ka hmuh than hrimhrim lai, tiah Minister Pu Sui Thio nih September 30 ah a chim.
“Hiti ka chim ngamnak hi ka meehmun dihlak deng in ka tlawng cang i thil sining kha ka chim mi a si. Khuate ah hin zatuak 75% ka tei lai. Khuapi chung ah hin zatuak 67% in ka tei fawn lai. Cun, 2015 kum thimnak lio ah Chawncum, Lichia, Lungraang le Phaizawng hna hi an lungfim cang. A ruang cu rian tampi kan tuanpiak hna. Rian a tuan mi le tuan lo mi cu kan i dang tuk cuh. Cucaah, teinak ka hmuh hrimhrim lai, tiah ka chim ngamnak a si ko,” tiah atulio Chin Ramkulh Cozah Lamsuul Minister a tuan lio mi Pu Sui Thio nih The Hakha Post ah a chim.
Minister Pu Sui Thio cu, 2020 kum thimnak ah Hakha Pyine No. 2 meehmun ah aa cuh lai. Amah he aa cuh ding mi hna hi; Pu Van Nawl (UDP), Pi Iang Tial (Independent), Pu Ngun Khar (USDP) le Pu Siang Mang (CNLD) hna he aa cuh ding an si, tiah kan theih.
