November 8 ah tuah mi 2020 kum Myanmar ram party tling democracy thimnak ah Chin Ramkulh chung in hnon mi mee thong 20 leeng a um i, 2015 kum thimnak lio nakin a tlawm deuh tiah Chin State Commission Zung sin in thawng kan theih.
Hi kong he pehtlai in Chin State Election Commission Zung secretary Pu Lin Kyaw nih, “Hnon mi mee hi a liamcia kum 2015 thimnak he zohchih ahcun tutan hi a tlawm deuh. Hnon mi mee a tam deuh hi kum 60 cung hlankan mee thla mi hna chung ahhin a si deuh tiah ka ruah. Hnon mi mee a tam cem hi cheukhat cu hrawh a si mi UDP party zong ah mee a thla mi an um. Cun, seal an namh tik zong ah aa palh mi tampi a um. Hi nak hmanh in a tlawm deuh ding khi kanmah lei nih cun kan duh mi a si ko nain voter education lei chimh cawnpiaknak ah tlamtlin lonak tete a um ca ah a si,” tiah The Hakha Post ah a chim.
Chin Ramkulh chung ah tuah a si ve mi thimnak ah hnon mee hna hi Pyithu Hluttaw mee hmun ah 7841, Amyotha Hluttaw mee hmun ah 6578 le Ramkulh Hluttaw 1 le 2 ah 6200 hna an si i, dihlak fonh 20619 a si tiah kan theih.
Cun, U Lin Kyaw nih, “Tutan thimnak ahhin mee a thla kho ding a voi hnih tiang cazin kan taar ning ah minung 286,308 an si i, hi chung ah mee a rak thla mi hna hi zatuak in 78% an si. Mee a thla mi hna hi Pyithu Hluttaw ah 222,905, Ramkulh Hluttaw 217,152 le Amyotha Hluttaw ah 216,964 an si,” tiah a chimchap.
2015 kum lio ah hnon mi mee hi Pyithu Hluttaw mee hmun ah 10,165, Amyotha Hluttaw ah 8517 le Ramkulh Hluttaw ah 6824 an si tiah kan theih.
2020 kum Myanmar ram thimnak ah Chin Ramkulh chung in ramkheel party (independent telh in) 12 an i zuam i, NLD party nih Chin Ramkulh chung Hluttaw thutdan 39 chung ah 36 hmun an laak tiah theih a si.
Photo/ Khonumtung Burmese
