A liamcia 2015 kum, Hakha khuapi kokek hark an ton lio philhlonak ca ah tiin Chin Convention Center minung 5000 tlum inn nganpi cu Hakha ah sak a si lai tiah CACC General Secretary Rev. Dr. Za That sin in thawng kan theih.
Hi inn an sak nakding hi Hakhathar i HCMF vawlei hmun ah pe 100×60 in an sak lai tiah theih a si.
Hi innsak ding kong he pehtlai in Rev. Dr. Za That nih, “Atu inn sak ding in timhlamhnak kan ngeih mi a ruang bik cu 2015 kum Hakha kokek harton kan ton mi philhlonak ca ah sak kan timh mi a si. Lai inn bantuk in kan sak lai. Hi inn sak nakding ca ah a liamcia kum 2016 lio in timhlamhnak kan rak ngei cang. 2019 kum ahkhan sak hram thok ding in khuakhan a si nain, COVID-19 zawtnak nih a kan phak ca ah kan thok khawh lomi a si. COVID-19 a vun daih deuh in tender kan auh lai i sak hram kan thok colh lai,” tiah The Hakha Post ah a chim.
Atu inn sak ding mi hi thinthang lawng ah minung 2000 le a chung ah minung 3000 an i tlum lai. Cun, hi inn sak nakding ca ah a dih ding hi US Dollar 2.5 million a dih lai tiah theih a si.
Tender an auh ding kong he pehtlai in Rev. Dr. Za That nih, “Kanmah lei nih kan i timh ning ahcun November thla chung ahhin tender auh ding kan i tim. COVID-19 a chuah ca ah a tlamtling kho lo. COVID-19 a dih in Tender kan auh lai. Tender kan auh tik zong ah rampi huap in kan auh hna lai,” tiah a chimchap.
Kum 3 in kum 4 kar chung ah hi inn hi sak dih dingin timhlamhnak an ngei tiah kan theih.
