2015-2020 kum karlak Hakha Peng chung sang le khuatekomh khuabawi le inn za uk a tuan mi hna chung in minung 5 ngeitu lei nih rian an phuah hna tiah theih a si.
Hi kong he pehtlai in Hakha Penguk Zung Lutlai U Myint Oo nih, “Khuatekomh le sang khuabawi, inn hra uk upa an dihlak minung panga rian phuah an si. Rian phuah mi hna hi Sakta khuatekomh khuabawi, Khuathar khuabawi, Cawbuk khuabawi, Dumva khuabawi hna an si. Cun, inn zaa uk upa rian phuah mi hi Leium (B) in a si. Hi hna hi an dihlak in khuatekomh khuabawi le rian ngei hna nih zulh ding mi zulhphung le upadi an zulh lo ca ah rian ngolter an si” tiah The Hakha Post ah a chim.
Hakha Peng chung ahhin khuatekomh 30 an um. 2015-2020 kum kar ah khuatekomh khuabawi minung 30 an um i, sang khuabawi 8 an um ve. 2021-2025 kar khuatekomh le sang khuabawi hna thimnak zong 2021 February le March thla chung ah thimnak an tuah cang lai tiah kan theih.
Atu 2015 in 2020 kar khuatekomh le sang khuabawi a tuan mi hna i an tuan caan hi 2021 March 31 in a dih lai i, khuatekomh le sang khuabawi aa cuh than ding poh kum 25 tlin a hau. Cun, sang chung ah khua a sa mi le Myanmar ram mi a si a herh tiah upadi ah aa tel.
Cun, khuatekomh le sang khuabawi hna hi Cozah lei nih thla khat ah Ks. 70,000 an pek hna i, zung hman ding ah Ks. 50,000 an pek hna. 2021-2025 kum kar tu ahhin cun tangka pekmi thanh ding le thanh lo ding zei aa fiang rih lo tiah kan theih.
