Hakha Khuhsilobo Ramkulh Sipin hruainak in Pangpardum ah an ser lai
Chin Ramkulh Sipin hruainak in Khuhsilobo cu a rauhhlan ah Pangpardum ah an ser cang lai, tiah tuanvo ngeitu sin in June 20 ah kan theih.
“Vasty Company he kan zoh cang. Hihi Ramkulh Cozah zong nih lungtling tein an kan pek cang mi a si. A rauhhlan ah thutnak, thingkung phunphun le lentecelhnak phunphun tibantuk kan tuah lai. Hi hmun hi acre 4 hrawng a si i ngaknu tlangval tlonlennak zong ah a tha ngaingai ding a si,” tiah Chin Ramkulh Sipin Lutlai Pu Thla Hre nih The Hakha Post ah a chim.
Hi hmun hi Ralkap nih siseh, mi dangdang nih an halh lengmang nain Pangpardum tu ah ser ding in lungtlin a si cang, tiah kan theih.
Thantlang khua motor dinhnak hmai vawlei a ceet mi lung an phah cang
Thantlang khua motor dinhnak cu ruahpi pehzulh in a sur mi nih motor dinhnak hmai vawlei cu a ceetter i motor le minung chawhlehnak ca ah tlamtling lo ngai in a rak um nain lungphah a si cang, tiah June 20 ah thawng kan theih.
“Vawlei a rak ceet tuk i umkalnak harsa tuk in a rak um. Asinain atu cu lung motor phur 50 in kan phah cang i umkalnak ca ah a tha cang. Hi lungphahnak ca ah bawmchantu le a retheitu dihlak cung ah lunglawmhnak tampi kan ngei,” tiah Thantlang Sipin Committee Pu Obed Nawl Ceu nih The Hakha Post ah a chim.
Hi lungphahnak ca ah lung bawmchantu hna cu; Pu Hram Lian Thang, Pu Thawng Hmung, Pu Ceu Kam, Pu Tuan Uk, Pu Bawi Khamh Cung, Pu Tawk Tha Hei, Pu Ni Chawn le Pu Maung Oo hna an si.
Hi lungphahnak a bawmchantu hna nih bawmhchanh mi le Sipin Committee tawlrelnak in Thantlang Motor dinhnak cu lungphah a si i lim a si cang, tiah kan theih.
Thantlang Lal Luai certual kam dawr a vawlei a feh ti lo ca ah an theh
Thantlang Lal Luai certual kam ah a um mi dawr khaan panga a um mi inn cu kan hnu zarh ruah pehzulh zin a sur ca ah a vawlei a fek ti lo i Sipin Committee le Thantlang Penguk Zung tawlrelnak in June 20 ah an theh.
Hi Lal Luai Certual kam ah dawrkhan a um mi hi dawr hnih a si i dawr khaan panga veve a um. Tutan theh mi hi a thlanglei kam ah a um mi inn a si i dawr khaan panga a um mi a si.
“A vawlei hi a fek ti lo ruahlopi in a tluk sual ahcun tihnung a si ca ah nan theh a herh tiin innngeitu ca kan pek hna. Zarh khat a rau cang nain an theh hlei lo ca ah Sipin tawlrelnak in kan theh hi a si,” tiah Thantlang Sipin Committee Pu Obed Nawl Ceu nih The Hakha Post ah a chim.
Hi bantuk in inn theh mi hi kan hnu zarh Myanmar ram pumpi huap in ruah pehzulh in a sur lio ah a vawlei a fek ti lo i innchung thil zong rak chuah cang mi a si.
Thantlang khua lawng si lo in Chin Ramkulh chung ah Paletwa, Hakhathar le hmun dangdang zong ah inn a cim mi le vawlei a min mi zeimawzat a um. Mizoram zong ah inn zeimawzat a cim ve.
Hakha Khuhsilobo Ramkulh Sipin hruainak in Pangpardum ah an ser lai
Chin Ramkulh Sipin hruainak in Khuhsilobo cu a rauhhlan ah Pangpardum ah an ser cang lai, tiah tuanvo ngeitu sin in June 20 ah kan theih.
“Vasty Company he kan zoh cang. Hihi Ramkulh Cozah zong nih lungtling tein an kan pek cang mi a si. A rauhhlan ah thutnak, thingkung phunphun le lentecelhnak phunphun tibantuk kan tuah lai. Hi hmun hi acre 4 hrawng a si i ngaknu tlangval tlonlennak zong ah a tha ngaingai ding a si,” tiah Chin Ramkulh Sipin Lutlai Pu Thla Hre nih The Hakha Post ah a chim.
Hi hmun hi Ralkap nih siseh, mi dangdang nih an halh lengmang nain Pangpardum tu ah ser ding in lungtlin a si cang, tiah kan theih.
Khaikam Market sing 180 dih in sak hram an thawk cang
Kalaymyo khuapawngte Khaikam khua market cu tangka sing 180 hrawng dih ding in June 15 ah an thawk cang, tiah June 20 ah kan theih.
“Chin Ramkulh chung khuapi tampi ah tukum hi market hmaithlak in tam ngai kan sak cang. Sak cuahmah mi le sak timh mi zong tampi a um rih. Khaikam market tu hi cu thla hnih chung ah an lim ko lai. Hakha Pyidawtha market zong sak hram an thawk than cang,” tiah Chin Ramkulh Sipin Lutlai Pu Thla Hre nih The Hakha Post ah a chim.
