Kalay-Hakha motor lampi cung ah a um mi Taingen SAC ralkap sakhaan cu nihin January 16 zinglei ah CNA hruaimi ṭangrual Chin miphun ralkap hna nih tlamtling tein an laak cang, tiah thawng kan theih.
“Nihin zinglei ah khan Pathian thawng in sakhaan kan laak cang. SAC ralkap tu nih cun Kalay lei in miakpi an rak kah pah lengmang rih ko,” tiah miphun ralkap pakhat nih a chim.
Taingen SAC ralkap sakhaan dohnak ah aa tel mi CDF CDM-Siyin zong nih, “Taingen SAC ralkap sakhaan a kan lakter khotu kan Pathian a lianngan ko seh,” tiah an Facebook Page ah Pathian thangṭhatnak an langhter.
Taingen SAC ralkap sakhaan cu January 12 thawk khan CNA, CDF CDM-Siyin, CDF-KKG, CDF -Thantlang, CDF-Hakha, PDA, CDF-Hualngoram, CDF-Zaniatram le TCDF hna nih an doh i, a ni nganak nihin zinglei ah tlamtling tein an laak khawh hi a si.
Taingen SAC ralkap sakhaan laak kahdohnak ah SAC ralkap lei in a thi mi an tam bang in Chin miphun ralkap lei zong in a nunnak a liam mi le hliam a pu mi an um, tiah thawng kan theih.
