Ralhraang Council nih Sagaing ramthen chung peng pathum cu February 22 ah ralkap uknak martial law an thanh chap.
Ralkap nih hramhram in uknak aa cuh hnu ah rammi nih ralhraang council uknak duh lo in an doh ca ah peng 37 ah ralkap uknak martial law a chuah i nizan ah peng pathum a chap than.
Martial law a thanhchapnak peng pathum cu Sagaing ramthen chung ah a um mi Shwebo, Watlat le Ayartaw peng hna an si.
Ralhraang Council nih February 2 ah Chin ramkulh chung peng 7, Sagaing ramthen chung peng 11, Magwe ramthen chung peng 5, Bago ah peng 5, Karenni (Kayah) ah peng 4, Karen ramkulh ah peng 2, Tanintharyi ramthen ah peng 2 le Mon ramkulh ah peng 1 ti in martial law a rak thanh.
Chin ramkulh Mindat peng tu cu 2021 ah Council ralhraang nih martial law a rak thanh cang.
